2Cor 3 | GbrGAW | STEP | Fye gye lo ge yi ci yihin nu? Fye gye lo ge dole nu, ngye shi azaho zhin, ya ɓe n awasika yi shi ntuge ya wu yihin tukwo n naje aba?

2 Corinthians 3

Efye Gaiciya Nu Zhin Yi Tnu-tnu Seida

1 Fye gye lo ge yi ci yihin nu? Fye gye lo ge dole nu, ngye shi azaho zhin, ya ɓe n awasika yi shi ntuge ya wu yihin tukwo n naje aba? 2 Of ye nu zhin eya wasika, n yi ku ka fi n ya bugba mi, ntuge zaho-zahoi wa kpe woi ce woi ba. 3 Wasika ye wu lo pei-pei ge, Kristi na ka kwo, woi ga yi kwo ge ya lo n cei. Kwo to kakpe lo n allo kuta nya nu n inki yim, ama nna ʼza bugba, n Shekwoyi Zafun yi.

4 Yi da deye ntuge yi kalai lo n Shekwoyi dna Kristi. 5 Nyahonyahoi to lo, n yi ɓami ya cige ya zhin tnu-tnu ye n ya kalai nu m, Eya kala kun n Shekwoyi aba nu. 6 Owo nu na zhin yi mi har yi zhin alkawali woi-woi ye bauta, nkwo to nyi owa kakayi fi nyi m, ama n Zafun nya. Owa zhin kwa ɓe n fi-i ama Zafun zhin wa ga wye-wye yi.

Kristi Mwa-mwa Woiwoyi

7 A ɓei ka owa kpe n akuta nu, Shekwoyi mwa-mwa kwa ɓe esa n wo ɓei ga n cei nyi. Kwo shi ko nyi mwa-mwa n kwo ɓei kpe n Musa wyeba ɓei la duya, kwo ɓei mwa har to a Israilayi ɓa mi ɓai shi wa wyem, ndai Owa n kwo ɓe n fi nyi, ɓei ɓe aza ba n mwa-mwa yeyi. 8 To ai mwa-mwa n kwo lo n Zafun tnu-tnu nyi, kwo du deye lo. 9 Tnu-tnu n kwo wu aza kwo mwa-mwa yi belle tnu-tnu n kwo gni aza? Ai kwo mwa-mwa yi gnasun lo. 10 Yi ɓa mi ya ci ge mwa-mwa n saiye nya kwo mwalo, mwa-mwa nkwo ɓei nyi n sapai nyi kwo la duya. 11 Gama ndai mwa-mwa ɓei nyi n kwo to ɓei mwasa dai-dai m, to aɓa ka mwamwa deyi gye wuna n kwo lo har abada nyiʼa?

12 Shi yi n wyetu yei lo nyi, yi ku ze abugba kala da. 13 Yi to wulo ngye Musa nu, n kwo ɓei zewo dole wa pui eje, n wa wyeba nyi ntuge to a Israila yi ɓa gye shi mwa-mwa lo konya n wu m.

14 Oɓa ɓo-nubozhin ɓei gu-gu yi, Har n saiye ma oɓa ɓonubozhin kwo-o gu-gu yilo n eje yi, esa nu ɓa ba littafi alkawali kwo-kwo yi nya. Eje ye zhin kwa kpeya esa oza ga Yesu gaiciya n cei. 15 Kwo n saiye ma esa ɓa ba Musa owa ncei ejehin zhin kwa gu ɓa ɓonubozhin. 16 Ama a zhin a kpe kwo ya shi litafi ku dage, “Musa eje ɓei la kmaya esa wo ɓei lo Dagayi aba nyi.” 17 To Dagayi n ya wo nu zhin Zafun, aba Zafun Dagayi nya lo, to, pwo-pwo lo. 18 Ntu cenu, eyi vinya wu Dagayi mwa-mwa ntna awyeba pui, yi mwa-mwahin konu kwa, ko kun abanu, nwo nu zhin Zafun nyi, kwo zhin kwa yi ze n gye owo degbe, n latu yi mwa so-sai.